من أفضل المجموعات اللي قابلناها وأشملها وأجملها للمرحلة العمرية من ٥ ل ٧ سنوات
المجموعة عبارة عن ٨ كتب :
الحديث (الجزء الاول)
الكتاب دة بيعرفنا يعني ايه حديث وليه بنتعلم الحديث وبعد كدة بيتكلم عن الآداب، والمميز فيه انه مش بيتكلم عن الاذكار فقط لا بيتكلم عن الآداب بصفة عامة وبعد كدة بيجيب الذكر الخاص بكل مشهد ، يعني مثلا آداب الطعام مش بس الذكر اللي بنقوله ، آداب النوم ، آداب المجلس ، آداب قراءة القرآن ، آداب الضيف وهكذا
الحديث (الجزء الثاني)
مقسم الى الأخلاق والعبادات
وهنا كل حديث ليه "شرح" وليه "ما يرشدنا اليه الحديث" باسلوب مبسط وجميل ومختارين الاحاديث فعلا بعناية المناسبة للاطفال في السن دة
العقيدة (الجزء الاول) (الجزء الثاني)
وهنا بييجي دور القصة اللي أحداثها بتدور بين صالح وجده وبيشرح اهم اسئلة في العقيدة والتوحيد بطريقة مبسطة و ١٠ من أسماء الله الحسنى وأركان الاسلام
القصص (الجزء الاول) (الجزء الثاني)
قصة سيدنا سليمان والنملة والهدهد واصحاب الفيل والجديد قصص من حياة الصحابة واختيارهم للقصص وطريقة عرضها فعلا جميل
التفسير
معاني الكلمات وتفسير الايات ومن فوائد الايات لتسع سور من جزء عم
السيرة النبوية
خلق رسول الله صلى الله عليه وسلم من صدق وامانة وعفو وشجاعة وكرم وصبر ، انا كنت مبسوطة وانا بقرأ ومبسوطة اننا هنكلم الاطفال في السن دة ونركز معاهم على أخلاق أشرف الخلق
كل كتاب فيه أسئلة كتير وانشطة والعاب للاطفال